قصيدة بعنوان//للشهيد//بقلم الشاعر المتالق//بسيوني صديق//

عادي ولا مش عادي ؟
*****************
عادي مش عادي
عندي ألف علامة
بيسموها الإستفهام
ضيعت مني الإبتسامة
نزعت مني الكلام
خلت عقلي شت
أقول ولا أسكت
ولا كله بيعدي
ولا عادي
ولا مش عادي ؟
*******
عادي مش عادي
الدم بقى رخيص
وكله بيعدي
زيه زي إللي قبله
وشوية صوات
علي شوية نواح
وانت الضحية
عيني عليك ياكبدي
يبقى عادي
ولا مش عادي ؟
*******
عموما اتعودنا
ولما نغضب
والغضب يولعنا
والمخ يضرب
نشيلك علي اكتافنا
ونوصلك لبيتك
وبعدها نرجع لحالنا
مش كده وبس وننسى
ونمارس حياتنا
يبقي عادي
 ولا مش عادي ؟
*******
يكتب الشاعر
قصيدة للشهيد
تحرك المشاعر
يلين الحديد
الثورة تقوم
يسقط الإرهاب
وإيه الجديد
ونبدأ من تاني
يبقى عادي
ولا مش عادي ؟
*****
اضرب ياريس
الخسيس مأجور
بيلم ويكييس
وجرابه مشطور
بشوية ملاليم
باع بيها وطنه
ومش فاهم ولاعارف
يعني إيه كلمة وطن
اضرب ويبقى عادي
ولا مش عادي ؟
******
عيني ع الحمام
ساب برجه وطار
وثأرك ياحمام
في رقابنا ليوم الدين
ارتاح ف قبرك ونام
احنا مش قلة
عددنا بالملايين
حقك هيرجعلك
وساعتها نقول عادي
ولا مش عادي ؟
******
كلمات بسيوني صديق